Mittelfest Disordini
Un viaç musicâl tra storie e contemporaneitât

Voci Vicine 2.0: une inchieste musicâl su lis tragjediis de nestre ete

Ai 27 di Lui, aes 21:30, Teatro Ristori di Cividât, al va in sene Voci Vicine 2.0, un event unic là che lis peraulis di inchieste de gjornaliste Luciana Coluccello si fondin cu la musiche di Fabio Cifarello Ciardi eseguide dal Icarus Ensemble. Vôs diferentis a denunziin lis tragjediis de nestre ete, a tacâ dal cambiament climatic fin ai problemis di lavôr e dal sociâl.

Une creazion origjinâl cu la gjornaliste che e fâs di naratore, l’ensemble strumentâl e dut il davoi di vôs e di musis che a contin, a denunziin, a berlin lis tragjediis dal dì di vuê. Un côr disordenât di apei, di denunziis e di invetivis, cun ancje filmâts curts sparniçâts inte rêt, si font cu la musiche di Ciardi, rivant a di une esperience passionade e che e cjape dentri.

Vie pal event la gjornaliste Luciana Coluccello e vuide il public cun storiis e imagjins. Lis vôs di une Italie e di une Europe che a reagjissin e che si oponin cun fuarce, a saran dutune cu la musiche, eseguide ancje dal cravuat Cantus Ansambl, par ufrî un spetacul cuntune fuarce emotive une vore alte.

No stait a pierdisi cheste prime assolude ai 27 di Lui aes 21:30.

Quartetto per la Fine del Tempo di Messiaen: une opare mestre a Mittelfest

Ai 27 di Lui, aes 19:00, li de Glesie di Sant Francesc, Mittelfest, cu la
colaborazion de Associazion musicâl Sergio Gaggia, al presente Quartetto per la fine del tempo di Olivier Messiaen. Cheste esecuzion, une tra lis oparis plui innomenadis di musiche di cjamare dal secul XX, e sarà un event dulà che no si pues mancjâ, soredut par cui che al è passionât di musiche.

Componût tra la fin dal 1940 e il tacâ dal 1941 intal cjamp di concentrament di Görlitz, inte Polonie di vuê, là che Messiaen al jere internât, il cuartet al rapresente une testemoneance fuarte e comovente des cundizions grivis là che al è nassût. La prime esecuzion e fo fate intal cjamp di concentrament, denant di un public di presonîrs e vuardiis, un contest che al à zontade une profonditât emotive inmò plui fuarte ae opare.

La partidure si vierç cuntun pas da cjapitul X de Apocalìs di Sant Zuan: «E o ai viodût un agnul plen di fuarce che al vignive jù dal cîl, […] disint: “No ‘nd è plui di Timp; ma te dì che il setim agnul al sunarà la trombe, alore il misteri di Diu si colmarà”». La opare e tache cun chest pas biblic, e denant dai disordins de vuere e vierç un slambri mistic e si fâs domandis su ce che al è “il timp” daûr di une clâf teologjiche, filosofiche e musicâl.

No stait a pierdi la ocasion di partecipâ a cheste straordenarie esecuzion ai 27 di Lui aes 19:00, un event che al regale une esperience musicâl e spirituâl che no si pues plui dismenteâ.