MITTELFEST 2024
DISORDINI
16-18 di Lui Mittelyoung / 19-28 di Lui Mittelfest

Cividât
Direzion artistiche Giacomo Pedini

Mittelfest, rivât ae sô XXXIII edizion, al siere la “trilogjie dal caos” e, dopo “Impreviscj” e “Inevitabil”, si fâs domandis sul teme dai DISORDINS, e su cemût orientâsi par cjatâ stradis gnovis.

Mittelfest 19 /28 di lui: al presente 29 progjets artistics che a rivin di 17 paîs e tra chei a son 15 primis assoludis o nazionâls e 7 produzions/coproduzions, cun tribûts a personaçs dal timp passât resint e lontan e spetacui di impegn civîl par un avignî gnûf. Dut al è messedât cun stîi diferents, gjenars e lengaçs, cun chê di sclarî ce che al pâr confusionât. 

Mittelyoung 16 / 18 di lui: une rassegne uniche in Europe che, cun 9 spetacui selezionâts, e met in sene la prose, la danze, la musiche e il circ de Mitteleurope under 30, dant un supuart reâl ai zovins. Chest an cu la novitât di un premi.

tra i protagoniscj di mittelfest: (daûr dal calendari) Igudesman & Joo, Jeton Neziraj, Giuseppe Battiston, Alessio Boni, Aleksandra Vrebalov, Josef Nadj, Moni Ovadia, Teatrino Giullare, Margherita Vicario.

Dut al mude cence polse, e chest al è un procès inelutabil di trasformazion che si disvilupe rompint ogni ordin che si cree, rivant a une cundizion dal dut gnove. No je maniere di parâsi, si à dome di lâ indenant intune cul mudâ dai events e cirî stradis gnovis che biel planc si tornin a meti adun. Cussì Mittelfest 2024, sierant une trilogjie, tant che une sinfonie dal caos ideâl  che e à contât di impreviscj intal 2022 e dal inevitabil intal 2023, e rive al teme DISORDINS. 

Te sô XXXIII edizion, Mittelfest – festival multidissiplinâr di teatri, musiche, danze e circ di riferiment pe aree dal Centri Europe e dai Balcans, cun sede a Cividât, al pee lengaçs, gjenars e stîi diferents, par rivâ a disberdeâsi intal “disordin” dai elements vignûts fûr de storie resinte e mancul resinte. Par fâlu, al festival principâl al learà pal cuart an di file ancje la rassegne under 30 Mittelyoung, che e met in sene une gnove gjenerazion de Mitteleurope.

Il diretôr di Mittelfest, Giacomo Pedini, al sclarìs cussì il teme che lu à ispirât pal program: «Se il mont al zire devant dai voi cussì svelt di rivâ a confondi: ce si varessial di fâ? Sierâsi dentri in cjase, cjalâ intun schermi ce che al sucêt difûr o metisi tal mieç de incuadrature tant che protagoniscj? Se no, fâ come un ecuilibrist sul fîl, scjavaçâ i events e cloteâ dilunc de nestre stradute strente, peâts e malsigûrs, ad ôr di un precipizi bande il travuart, tra conflits, ilusions, corsis, sperancis e altris grancj disordins.

Il dât nol è ancjemò stât trat. Il nivel di savoltament di chescj agns al è une vore alt e la Europe ocidentâl e centrâl e à pôre di no savê plui cui che e je, di viodisi piês, ma – par fortune – ogni tant e spere ancjemò di scuvierzisi miôr.

Ancje se, il mudâ ingredeât e svelt dai events al è propit la cundizion de storie e de nature, che no tornin mai compagnis: in cheste nestre civiltât algoritmiche, che e va a parâsi inte rigjiditât de machine e inte inesorabilitât de tecniche dal control, o crôt che il spetacul dal vîf, che al è ancje svoladi, al sedi la ocasion par abandonâsi al caos tant che creatôr vîf di pussibilitâts».

I doi festivai internazionâi a laran in sene daûr di chest calendari: dai 16 ai 18 di Lui Mittelyoung, e dai 19 ai 28 di Lui Mittelfest. Vie pal an, invezit, Mittelfest al va indenant cul non di Mittelland, cun events che i dan continuitât e che a mostrin la sô funzion di puint tra colaborazions europeanis e realtâts dal teritori.

In numars, i doi festival a metaran in sene 38 titui in dut, cjapant dentri artiscj e artistis di 19 Paîs diferents de Mitteleurope, dai Balcans e des zonis dongje e altris intal mont (Italie, Russie, Svuizare, Cossovo, Republiche Ceche, Estonie, Bosgne e Erzegovine, Norvegje, Grecie, Cravuazie, Serbie, Ongjarie, Macedonie, Austrie, Slovenie, Polonie, Romanie, Paîs Bas).

Intal detai, Mittelfest chest an al varà 29 progjets artistics – 16 musicâi, 8 teatrâi, 3 di danze e 2 di circ, che a chei si zontin i 3 spetacui selezionâts di Mittelyoung, par 15 primis assoludis e talianis, 7 produzions e coproduzions, cjapant dentri 17 Paîs diferents.

Mittelyoung al varà 9 spetacui, o ben i vincidôrs dal bant che si à sierât tal Fevrâr passât cun 250 candidaturis rivadis di dute la Europe: 2 di teatri, 2 di musiche, 2 di danze e 3 di circ, che a rapresentin 9 nazionalitâts diferentis.

MITTELFEST 19/28 di Lui.

Il program

La scree uficiâl di Mittelfest 2024 e sarà ai 20 di Lui cu lis autoritâts presintis, ma za a tacâ dai 19 di Lui si vierzarà il sipari cul tradizionâl conciert di scree che, cul conciert finâl, a son une sorte di suaze musicâl dal festival, chest an plui che mai par vie che si metin adun cualitât e zûc.

Ai 19 di Lui e larà in sene in Place dal Domo Happy concert, une produzion là che il duet Igudesman & Joo si esibissarà cu la FVG Orchestra e cun Lucy Landymor aes percussions par fâ un vêr zapping musicâl, di Mozart fintremai i Beatles. Ai 28 di Lui, invezit, midiant de colaborazion che si fâs aromai ogni an cun Ravenna Festival, e sarà la cjantautore, atore e autore di podcasts e regjiste cinematografiche Margherita Vicario, che, acompagnade de Orchestra Corelli, e larà in sene cun Gloria!, conciert sinfonic cul titul dal so prin film, in concors al ultin festival di Berlin.

Tacant a lâ insot intal program, o cjatìn prin di dut spetacui, tancj gnûfs, che, cu la presince di protagoniscj impuartants, a cirin ordin scrusignant intes tessaris dal timp e dal spazi.

Fra chescj, il tribût comovent al poete furlan Pierluigi Cappello, muart intal 2017, cul spetacul Le tue parole. Scluse, Pierluigi e il cîl, in sene ai 21 di Lui in prime assolude, cu la interpretazion di Giuseppe Battiston, la musiche origjinâl di Piero Sidoti e la regjie di Paola Rota, che cun Battiston al à curât ancje la dramaturgjie dai materiâi origjinâi dal poete di Scluse, cjapant dentri lis sôs lirichis e lis prosis di Questa libertà (Rizzoli), metint dongje midiant de musiche lis peraulis furlanis e chês talianis. Il spetacul al è une coproduzion ARLeF – Agjenzie regjonâl pe lenghe furlane e Mittelfest 2024.

Une altre dediche e je chê dal Teatrino Giullare, cul so teatri di figure elegant e poetic, a Franz Kafka, pai 100 agns de sô muart, intal spetacul La tana, in sene, in prime assolude, ai 26 e ai 27 di Lui in modalitât itinerante tes segretis de glesie di Sante Marie dai Batûts.

E je siore di polemiche invezit Negotiating Peace, une grande coproduzion internazionâl che e met adun 9 paîs (Cossovo, Italie, Gjermanie, Republiche Ceche, Estonie, Bosgne e Erzegovine, Norvegje, Stâts Unîts/Serbie). Scrite dal cossovan Jeton Neziraj e direte di Blerta Neziraj, subit dopo vê debutât in patrie e rivarà sul palc tant che prime nazionâl ai 20 di Lui. E je une comedie sarcastiche e scomude sui procès di pâs, tant desiderâts tal nestri presint fat di vueris. Il spetacul al è produsût di Qendra Multimedia cun Teatro della Pergola, euro-scene Leipzig, Prague City Theaters, R.A.A.A.M, Kontakt, Black Box Teater, My Balkans e Mittelfest 2024.

L’impegn civîl al è ancje l’element dal spetacul di Moni Ovadia, che al torne a Mittelfest pe prime volte dopo che al veve diret il festival dal 2003 al 2008. Ovadia ai 25 di Lui al puartarà a Cividât Senza Confini. Ebrei e zingari, un so cjaval di bataie, ma cuntune musicalitât rinovade, come che al è il so stîl, par un recital di cjants, musichis, storiis rom, sintis e ebraichis par savoltâ i conformisims e proclamâ che la libertât no si le pues negoziâ.

Poetic e plen di memorie al è il spetacul Talk radio (produzion de Accademia Naonis cun Mittelfest 2024) par peraulis e musiche, in sene ai 22 di Lui in prime assolude, ideât di Valter Sivilotti, su test di Angelo Floramo, cu la interpretazion di Alessio Boni e lis musichis di Glauco Venier, Mirko Cisilino e Alfonso Deidda. Il fat che al ispire la imprese al è une strane stagjon jazz che e à animât Gurize tra il 1945 e il 1947, cuant che lis trupis americanis di liberazion a vevin viert une radio che e trasmeteve grancj tocs musicâi.

Cetant spietade e je ancje la gnove creazion dal innomenât coreograf ongjarês Josef Nadj, in sene ai 23 di Lui in prime nazionâl cun Full Moon. Il colm di lune, fin e principi di ogni cicli, al devente struture ritmiche e dopo jazz, lant indaûr fin aes sôs origjins lontanis, che a son rapresentadis di vot balarins africans.

Une creazion origjinâl, Voci vicine 2.0, e sierarà chest grup di spetacui ai 27 di Lui. La esibizion e metarà dongje lis peraulis di inchieste de gjornaliste televisive Valentina Petrini e la musiche di Fabio Cifarello Ciardi cun Icarus Ensemble.

Tantis vôs che a denunziin lis tragjediis dal nestri timp, dal clime al lavôr e al sociâl.

Lant indevant cul program daûr dai gjenars, il calendari de sezion teatri di Mittelfest 2024 al propon ai 28 di Lui, in prime nazionâl, il pluripremiât spetacul sloven Paradiž. Una commedia amara, cu la regjie dal talian Matteo Spiazzi. Une storie dolce e crudêl, cence peraulis, basade su storiis veris dai nestris timps. Ai 28 di Lui, si podarà po scoltâ inte sô “version acustiche”, dopo de metude in onde ai 8 di Jugn su Rai Radio3 e po su Rai FVG, La Cripta dei Cappuccini, la prime part de trilogjie Inabili alla morte/ Nezmožni umreti, che e à debutât a Gurize ai 11 di Mai stâts e che e fâs part dal program uficiâl di Go! 2025, Nova Gorica e Gurize Capitâl Europeane de Culture. Lis vôs a son chês di Nicola Bortolotti, Francesco Migliaccio, Camilla Semino Favro e Simone Tangolo, direts di Giacomo Pedini, autôr cun Jacopo Giacomoni ancje de riduzion dal test di Roth, cu lis musichis origjinâls di Cristian Carrara e FVG Orchestra.

Roth al è l’autôr che al ispire ancje Zlotogrod, in program ai 27 e ai 28 di Lui in prime assolude e cu la produzion di Mittelfest, che al sarà un dai doi spetacui itinerants di cheste edizion dal festival. Cul test e la regjie di Jacopo Giacomoni, cheste volte lant daûr di ce che al conte il scritôr austriac, i atôrs dal Collettivo Amalgama e i artiscj dal Circo all’inCirca a mudaran come intune magjie Cividât in Zlotogrod, la citât dal Imperi austroongjarês.

Il secont spetacul itinerant al è Cosmorama di Nicola Galli, e cun chel o passìn ae  danze: ai 20 e ai 21 di Lui al puartarà une esperience di danze inte nature, savoltant la jerarchie dal cjalâ, par “balâ il paisaç”. La danze e sarà presinte ancje ai 26 di Lui cu la propueste italobelghe Fortuna, cu la ideazion, la regjie e la coreografie di Piergiorgio Milano: doi acrobats e balarins che si movin suntune struture di inzirli par tornâ sù dai abìs.

Il teatri cec di Loutkoviště (pipins) di Waxwing Theatre e Art Prometheus, in sene ai 21 di Lui, nus mene al Progjet famee, une part dal festival par grancj e piçui, cul teatri di figure, une instalazion interative cuntune “machine invente storiis” che e clamarà dongje il public.  In cheste sezion, o cjatìn ancje i spetacui di circ: ai 20 di Lui Uno spettacolo di Circo all’inCirca, ispirât al lavôr di Hervé Tullet, par un viaç interatîf tra formis, colôrs e ritmis. Po, ai 21 di Lui, Danger, de Compagnia Due, ven a stâi un spetacul cui clowns che al rive de Svuizare, fat di tant umorisim e cence peraulis. Par finî, la propueste polache In viaggio con Bazylek, in sene in prime nazionâl ai 27 di Lui, cu la elegante Sinfonia Varsovia Wind Quintet e la vôs che e conte di Malina Sarnowska, nus fasarà cognossi un drâc un tic stramp; e je musicâl ancje la propueste di Pizz’n’Zipp, DiVerdiamoci, che ai 28 di Lui e cjaparà dentri i plui piçui intun viaç tal timp curiôs, fin a rivâ li de cjase di Giuseppe Verdi.

E cumò passìn ae musiche di Mittelfest 2024. Pe world music, ai 24 di Lui e torne a Mittelfest te Place dal Domo la band Džambo Agušev Orchestra cun Brasses for masses: une pacassade di otons e di percussions che si ispire ai bai di gjonde des gnocis intai Balcans. La dì prime, ai 23 di Lui, il grup Balkalar al cjaparà dentri cuntune energjie di no crodi il public di Mittelfest, cun ritmis e melodiis dal Balcans, cjançons tradizionâls de Macedonie, de Serbie, de Cravuazie e de Bosgne e rangjaments che a stiçaran la voie di balâ. La produzion Mittelfest Kernconfusion, ai 25 di Lui,e rivarà di fuarce cun ritmiship hop emelodiis becantis, par un viaç dentri dal univiers eletric di cuatri zovins musiciscj de Carinzie. Ducj i trê i concierts a son a Cividât pe lôr prime nazionâl.

Pelagos di Katerina Papadopoulou e dai Aegean Arc, ai 21 di Lui, nus mene invezit in Grecie, intun itinerari musicâl des Cicladis al Dodecanês.

Pe musiche classiche e no dome, a rivin lis sugjestions poliedrichis de Polonie, a tacâ di Mindbowing, dal tercet The ThreeX, pe prime volte in Italie, che ai 28 di Lui cun doi lirons e un piano a savoltaran ogni prevision, sclopant intun turbin di danze, circ e pantomime, messedant Mozart, rock’n’roll e tango, colonis sonoris e tormentons pop. Quartetto per la fine del tempo di Olivier Messiaen, par liron, clarinet, violoncel e piano,coprodot di Mittelfest cu la Associazion musicâl Sergio Gaggia, in program ai 27 di Lui, e je une des oparis di musiche di cjamare dal secul XX plui cognossudis.

Ai 25 di Lui, con Nutshell, in prime nazionâl, il cuintet di flâts de famose Sinfonia Varsovia al met adun oparis di compositôrs polacs e no dome, tant che intun scus di cocule.

Ancjemò, ai 25 di Lui, a conferme de colaborazion cul pluripremiât pianist Alexander Gadjiev, ambassadôr di GO! 2025 e artist di cjase a Mittelfest, in Romantico disordine o scoltarìn pianiscj che a rivin di ogni bande dal mont. Ai 23 di Lui, il conservatori Tartini di Triest, cun Antennae/Liturgia, al puarte a Mittelfest la innomenade compositore serbe Aleksandra Vrebalov, cuntun conciert mistic pe prime esecuzion taliane cun cjantôrs bizantins, côr, flâts e arcs, ispirât ae Vergjin Eleusa dal secul XV. Event di cooperazion culturâl Italie – Serbie: Conservatori “G. Tartini” di Triest, Facoltât di Musiche – Universitât des Bielis Arts di Belgrât, Academie des Arts di Novi Sad e Côr St. Jovan Damaskin, Côr de Glesie Serbe Ortodosse di Sant Spiridion di Triest, Conservatori Benedetto Marcello di Vignesie.

Ai 24 di Lui, par finî, il conservatori Jacopo Tomadini di Udin al propon Gianni Schicchi, un classic pucinian.

A Mittelfest a saran ancje i 3 spetacui selezionâts di Mittelyoung e tancj altris events. Par esempli, il Premi Adelaide Ristori (ai 19 di Lui) e i “Kaffee” cui artiscj. E po workshops, proiezions di curtmetraçs sore sere cun Mittelimmagine e events di promozion cun Promoturismo FVG. Chest an Mittelfest al sarà ancje la sede dal Forum di Associazione Mitteleuropa cu la Repubbliche Ceche tant che paîs ospit.

MITTELYOUNG 16 – 18 di Lui

Mitteyoung, il festival under 30 de Mitteleurope, al è un dai elements plui origjinâi che Mittelfest al puarte inte farie dai festivai talians e europeans: al è rivât ae sô cuarte edizion e al è un apontament cetant spietât, par viodi une gjenerazion in sene e par dâ ancje un supuart concret ai plui zovins.

A son 9 i spetacui di artiscj under 30 che a rivin a Mittelyoung 2024: 2 di musiche, 2 di teatri, 2 di danze e 3 di circ, a cjaparan dentri a Cividât artiscj zovins de Belgjiche, de Italie, dal Paîs Bas, de Romanie, de Serbie e de Svuizare, dopo di une open call cun 250 candidaturis rivadis di dute la Europe.

La novitât dal 2024 e je la jurie di esperts, che e varà di valutâ e valorizâ lis propuestis miôr e plui interessantis tra lis nûf di Mittelyoung. I zurâts pal 2024 a son trê professioniscj cun cetante esperience tant che Alberto Bevilacqua, Veronika Brvar e Roberto Canziani.

Program:

Chest an Mittelyoung al varà un calendari diferent, o ben intes zornadis prin di Mittelfest, di fat al tacarà ai 16 di Lui cun trê spetacui. Si tache cun De Origine, spetacul talian di musiche, cun Vittorio Gravagna ae ghitare eletriche, Giovanni Nardiello ae batarie e cu la vôs di Noemi Fiorucci, par un stîl dificil di incuadrâ, che al à lis sôs lidrîs intal minimalisim, inte eletroniche e che al va indentri intune esplorazion di timbris e di melodiis rafinade e coragjose. Po dopo il circ di Son tutte palle, de compagnie taliane Chalibares, di e cunAlice Lombardi e Andres Schlein, che nus mene tal tinel di doi anzians, simpri denant de television che e devente la proiezion des lôr vitis, ma cun situazions tragjicomichis. Al siere la prime zornade un spetacul di danze de Romanie, MANual, dal grup Platform 13, che al è un atac diret a cemût che e ven rapresentade la masculinitât, e al è ancje un manifest, un collage di citazions e clichés. I cinc cuarps di Dorin Eremia, Sergiu Diță, Dennis Ilie, George Pleșca, Anca Stoica si movin su la sene, direzûts di Sergiu Diță, par esplorâ i stereotips di un gjenar e par metilu in crisi.

Ai 17 di Lui si tache cu la danze di Home, spetacul olandês diret e eseguît di Bai Li Wiegmans, un film e un assolo di danze par contâ dal viaç maraveôs di une cinese adotade. La seconde dì e va indenant cul spetacul di circ Santa & Glitter, che al met adun artiscj di Svuizare, Gjermanie, Messic e Argjentine, di e cun Ana Maria Alcocer e Caro Wuttke. Une stele de musiche disco dai agns ‘80 e une queen santificade a vegnin fûr di une tasse di blancjarie e a clamin dongje il public intal lôr tinel stramp e nus compagnaran intun show MTV, tra il glam e il trash. A sierâ al rive de Serbie Lonesome Balkan, ispirât in maniere libare a The Lonesome West di Martin McDonagh, spetacul teatrâl di umorisim neri cun Milan Bobić Luka Antonijević, Marija Stefanović, là che i fradis Vladimir e Kosta si fasin vuere cence polse pes robis mancul impuartantis e no rivin plui a fidâsi di nissun e di nuie.

Ai 18 di Lui, il spetacul di circ belgjic todesc Renè, di e cun Xenia Bannuscher e Dries Vanwalle,doi artiscj che si corin daûr su la sene, a tacâ di un piçul e sempliç moviment dal cjâf, fintremai ae mecaniche complicade di une acrobazie, par mostrâ la gjonde dal mudament di dut ce che al podarès someâ compagn. Dopo, une propueste taliane di teatri cun Twisted world, dal manifest di Elliot Rodger, un progjet dal duet artistic Ucci Ucci. In sene Gabriele Graham Gasco e Giovanni Conti a tornin tal 2014 in Californie, là che Elliot Rodger, vincjedoi agns, al cope sîs personis e a ‘nt ferìs cutuardis. Il spetacul al tire dongje i events plui impuartants de sô vite, a tacâ de sô infanzie fin ae dì dal maçalizi. Mittelyoung 2024 si siere cu la musiche rumene dai Marquis Noir, Patricia Marchiș al saxofon, Tim Thieme aes tastieris, Cristian Cioloca ae ghitare, David Vshayn al bas, Sebastian Arvai ae batarie, par un conciert che al imbine musiche, circ e teatri, video mapping, coreografie e fashion design; energjie e calme, armonie e disordin, passion e tecnicisim.

Dongje di chescj doi festivai nazionâi, il calendari di Mittelfest si disvilupe dal prin di Avrîl ai 31 di Dicembar cun Mittelland. Di chest event o darìn inzornaments un pôc a la volte plui indenant.

Cun di plui, Mittelfest, al è ancje la sô tiere e la sô citât, Cividât, patrimoni mondiâl de Unesco: une rêt di public, di artiscj, di ospits, di citadins e une rêt di hotels, di ristorants e di cafès intune des tieris plui cognossudis de Italie pe sô storie e pai siei savôrs. Al è un pont di riferiment enogastronomic internazionâl cun dongje i paisaçs unics des Vals dal Nadison e de Tor, tieris ideâls par un turisim lent.

UFFICIO STAMPA MITTELFEST

Nazionâl/ Internazionâl
Giulia Calligaro
giulia.calligaro4@gmail.com  
+39.349.6095623

Macroregjonâl
Francesca Gatti
f.gatti@reportagepr.com
+39.347.9854644

Gjenerâl
ufficiostampa@mittelfest.org