Par celebrâ i cent agns de nassite di Franco Basaglia, i siei prins arlêfs e la gjenerazion di miedis sucessive a contin cemût che il psichiatri al veve pensade la sô teorie rivoluzionarie su la salût mentâl, centrade su la persone e su la sô malatie, sdrumant il sisteme dai manicomis. Imagjins di repertori e testemoneancis diretis nus mostrin l’orôr de segregazion tal manicomi e cuale che e varès di sei la prassi de cure elaborade di Basaglia. E vuê? La leç 180 “Basaglia” ise stade aplicade dal dut, come che e varès? Cemût si curino vuê lis personis cun problemis mentâi? Ce fasie la sanitât publiche pe salût mentâl? Al è un film che nol da rispuestis, ma che al vierç un dibatit suntun teme une vore delicât che vuê si cîr di dismenteâ.

Jentrade libare fin che al è puest
In câs di brut timp, la proiezion si fasarà te Sale Sociâl de SOMSI di Cividât

Une flabe dai nestris timps che e celebre cu la musiche la fuarce e la bielece de convivence di plui culturis. Kamla si è trasferide di pôc cui siei gjenitôrs intun palaç degradât de perifarie di Triest, dulà che a vivin altris fameis imigradis e un vecjo professôr che al odee ducj. Cuant che al rive l’avîs di sfrat, i oms, che no vuelin lassâ lis lôr cjasis, a reagjissin cun rabie cuintri dal paron disonest che ju menace; lis feminis, invezit, si unissin tra di lôr par salvâ il destin des lôr fameis, tra ridadis, vaidis e incomprensions. Intant che il professôr Leone al devente amì di Kamla cuintri de volontât dal pari, Shanti, la mari de frute, e dimostre di savê balâ tant che une stele di Bollywood. Cul jutori di une amie taliane, al nas il progjet di vierzi une scuele di danze e tal cuartîr za si fevele des Babylon Sisters.

Jentrade libare fin che al è puest
In câs di brut timp, la proiezion si fasarà te Sale Sociâl de SOMSI di Cividât

Operari, soldât, militant, presonîr, cospiradôr, bombarûl, esiliât: Umberto Tommasini (1896-1980) al è stât dut chest e ancje tant altri. Al jere un fari, un anarchic che al à traviersât dut il secul XX trasmetint a fuart la sô maniere umane di vivi la vite. Un documentari al conte la vite semplice di chest fari militant, di Triest, sô citât di nassite, e dai grancj events che a àn savoltât la Europe tai prins dal Nûfcent. Cun imagjins di archivi, intervistis e animazions origjinâls, il documentari al ricostruìs la vite di un om dominât di un grant umanitarisim e di une ironie costante. Un om che al à volût dedicâ, cence mai pintîsi, dute la sô vite ae lote politiche e che al à paiât di persone il presit de sô sielte.

Jentrade libare fin che al è puest
In câs di brut timp, la proiezion si fasarà te Sale Sociâl de SOMSI di Cividât